甜心‧心甜

"哥哥，妹妹 8 點放工，等埋一齊食飯，好嗎？＂ 心言問兒子。

＂今晚打冰上曲棍球，我 7 點半要出門口。。。＂

＂咁煮碟頭飯，蕃茄免治牛肉飯加煎蛋，您早啲食，媽咪等埋妹妹一齊食。＂

＂啊，唔該!＂

。。。7 時 45 分，＂咦，哥哥，仲未出去？＂

＂噢，攪錯咗，打 9 點半，8 點半至出去!＂

。。。8 時 15 分，女兒返抵家門，

＂食得飯啦，妹妹。＂

＂媽咪，我唔喺度食喎，昨晚已跟您說了!＂

＂啊，係咩?!＂ 心言在想。。。

＂妹妹，don't be so mean,   媽咪等埋您至食飯!＂ 兒子說。

＂哥哥您食咗嗱？＂

＂係呀，我去打波，媽咪話佢等您!＂

＂噢，媽咪。。。I love you, 我洗完手陪您食飯!＂

＂唔使啦，您出去食飯，唔使陪我，係媽媽無記性!＂

＂唔得，我想陪您食!＂

＂都話唔使咯!＂

＂唔得，我要食!＂

＂咁好啦，畀一啖飯您啦!＂ 誰知女兒再添一口飯，＂食肥您呀，食完出去又食!＂ 心言取笑女兒。

＂鍾意食您煮嘅嘢，出去食少啲囉!＂

：）