茶聚拾趣〔二〕減肥秘訣

賢慧的 E 君，夫妻恩愛，出名模範，丈夫入籍後成加、港兩地太空人，E 君留守温哥華直至去年小女兒入讀大學才回流香港陪伴丈夫，每年往返數次探望乖兒女及媽媽。

E 君最近回加省親，跟好友茶聚說：＂返香港前要減番幾磅。。。＂

廚藝高手 S 君說：＂試下煲紅豆粥 - 薏米加紅豆，一日三餐食兩、三日實瘦幾磅，喜歡落盬、糖或唔落都得。＂

巧手的 G 君說：＂煲五味粥都得，五種豆，健康又減磅!＂

心言說：＂運動、健康飲食和份量對減磅有直接影響和果效。＂

然後，齊聲對 E 君說：＂其實都唔覺得妳肥咗喎!＂

＂我老公昨晚喺 web-cam 喥同我講：「老婆，聖誕節送個大禮俾您，睇咗您幾日，您一啲都無肥瘦，重靚咗!」＂ E 君續說：＂我答番老公：「你有無聽過啲生活枯燥嘅人見到隻豬都會覺得好清秀可人呀!」＂

幾個女人聽完爆笑!

〔資料圖片〕

茶聚拾趣〔一〕Free~Two

廚藝非凡的朋友 S 君說：＂本來退休會清閒啲，點知自己走去買呢買路。。。跟著攪到自己好唔得閒。＂

這位朋友喜歡網上購物，亦喜歡買 cooking gadget。。。

於是心言說：＂咦，幾時攪番個 garage sale,  然後叫我哋過嚟買！＂

＂講起 garage sale 就好笑，早前我對面鄰居攪，我執咗啲嘢叫佢順便送俾人，佢話：「妳啲嘢唔使錢，我啲點買?」 我話：「是但啦，你幫我揸主意。」 "  S 君續說：＂Garage sale 完，個鄰居走嚟同我講：「呢兩蚊係妳嘅，個中國女人咁得意，係都要俾兩蚊我!＂

"?"

＂佢拿住三樣東西問我 「How much?」，第一樣我答「Three」，第二樣我答「Two」，第三樣我答「Free」，佢話：「Two」，我再話「Free」，佢係都堅持話「Two」，咁咪幫妳收咗兩蚊囉!＂

〔資料圖片〕

責任感

和一班朋友茶聚，閒談間說起時下年青人大部份對責任感沒有什麽意識。衣、食、住、行依然由父母負責，他們不覺得有問題，跟我們一輩大相逕庭。

有認為是因為工作難覓，有認為是懶惰成性，有認為是父母造成。。。

各抒己見之際，賢慧的朋友說：

＂我哋已經同啲仔女講好，出嚟做嘢，人工要攞三份二回家，成家立室後，攞三份一回家，到養兒育女時，全數歸佢，冇本事唔好談婚論嫁。。。現時女兒做 part-time 人工全數拿回家。＂

＂得唔得呀?!＂ 精明能幹的朋友說。

＂得，由細到大嘅衣、食、住、旅行、學費都係父母供給，出社會做事，工資回報屋企是應當的，亦由此培養責任感。＂ 賢慧的朋友續說。

心言記得初出社會工作亦如是。。。

責任感的確要互動培養!

這位好朋友養兒育女有一套準則，並持之以恆，例如在家一定要講中文，跟婆婆要講家鄉方言，待人接物謙恭，禮數周全。。。

朋友兒女成才，心言欣羡，心裏替朋友歡喜!

〔資料圖片〕

禮物

女兒出門外遊的早上，心言行出房門口,  見一袋禮物放置門前，打開查看。。。

早前妹子託女兒買此款式手袋，心言說過喜歡，也想自己買一個，但是當時缺貨，也就不了了之，想不到女兒放在心上，給心言一個驚喜!

今天行出房門口，又一份禮物。。。溫暖牌毛冷圍巾!

敲門問兒子：＂謝謝你，是你親手編織的嗎?＂

＂係呀!＂ 兒子自豪地回答。

＂朋友教你織?＂

＂網上學嘅。＂

＂哇!  好叻喎!＂ 心裏感動! ＂咦，頭段跟尾段的編織 pattern 唔同，幾特別喎：）＂

＂唔係呀，係我織錯咗，將錯就錯：）＂

＂哈哈哈，又幾好效果喎!＂

從來慈母手中線，今天兒子親手編織的第一條圍巾。。。珍而重之，謝謝你!

今天打著温暖牌圍巾四處去，朋友們跟妹子都讚賞兒子的手藝唔錯!

火樹銀花

火樹銀花迎聖嬰

 

歡天喜地接福音！

 

祝聖誕快樂

 

Merry Christmas!!!

因快得慢

在百貨公司內，各櫃枱都排著 last minute shopping 的人龍，心言也想先清付賬單，再作購物衝刺。

好不容易找到一個零排隊的櫃位，正想趨前。。。卻見該工作人員將食指挖入鼻孔，然後見到心言，順手指抹落前面擺放的購物袋，隨聲閒問：＂有什麼可以幫妳?＂

＂我想清付賬單。＂想著工作人員剛才的噁心動作，又豈可讓她踫我的物件?! ＂唔使啦!＂隨即返回附近人龍排隊，唉，因快得慢。。。

慈善

女兒跟朋友參與籌辦 Salvation Army 慈善籌款晚會，兒子亦於當日當義工，心言跟妹子當然支持買票參與。

會場是 Main Street 一間專租與 special event 場館。晚上7-11時，年青人找來各式餐館供應食品、公司禮品贊助、有 DJ、音樂、拍照、抽獎，攪得有聲有色，籌得 $17,000.00，one night event, 成績算是不錯。

難得的是年青人有一顆善心!

無聊的聖誕老人

閒著無聊的聖誕老人。。。

誤會

＂嗄，叫個「福祿壽」定要個「老少平安」老火湯好呢?＂餐廳內，茶客與朋友相量著說。

＂對唔住，呢兩款唔係湯，係老板祝大家老少平安同福祿壽全!＂ 伙記搭咀。

我都唔想!

＂咁唔小心嘅?＂

＂唉，我都唔想!＂

＂咦，唔明你點跌?＂

＂我自己都唔明!＂

時差

有朋自香港回來，相約一班好友茶聚。

見面時，大家交換聖誕禮物：

有巧手及富創意的 Grace 自制耳環，細心 Ginny 送給大家的 anti-wrinkle + dark circle + anti-bag eye cream,  烹調高手 Stella 親自泡制的果仁及曲奇，賢慧的 Elisa 遠道帶來特別編織的圍巾及香水，心言送給好友們精選圍巾。。。

歡樂氣氛連鄰座相熟客人都受到感染，行過來湊熱鬧!

席間大家天南地北，互相 update,  由化粧、護膚、時裝、飲食、娛樂、旅遊、時事，無所不談。。。

＂埋單啦，每人 $11.25。＂ 心言計算後告知各人。

。。。咦，HK$10?

＂對唔住，時差!＂ 賢慧嫻淑的 Elisa 懢忦地笑著說，＂我下星期回港之前飲多次茶，好嗎?＂

＂好!!!＂ 大家齊聲回答。

妳 - 好 - 靚

上班忙完一個早上，到附近一間台灣館子吃午飯。

店內坐滿食客，心言被安排入座的坐位，左邊食客講英語，右邊食客講廣東話。。。

不過，心言沒有留心也聽不見她們的對話內容，簡直就是 ＂置若罔聞＂。

直至到左邊兩位英語女士用膳完畢離坐時，其中一位微笑著對心言用半醎淡中文說：

＂妳 - 好 - 靚!＂

心言感覺意外驚喜，連忙回應：＂Oh, thank you!"

這位女士再微笑對著心言豎起大拇指。

雖說各花入各眼。。。

心言還是開心了一陣子!

送機

女兒搭凌晨15分航機往香港省親遊玩，心言預約女兒下班即趕返送往機場及吃點東西。抵達機場巳是 10:25pm, 女兒自行入內過磅行里，心言在外等候。。。接回女兒已是 10:50pm,  上機時間 11:40pm，最近連車程，只有 20 分鐘吃的時間，想著往那裏找吃的呢。。。沿著三號路行，理智地駛入 Tim Horton.

女兒叫了 ＂chili cup",  心言要了杯 ice cappuccino,  坐下來看著時間吃東西，＂chili cup" 附有一條面包，女兒吃了半邊，（太急心言什麼都吃不下），剩下的心言帶回家，見裝面包的袋子除半個包外，還有一小塊，於是隨說隨放進口內說：＂咁得意撇剩一小塊嘅?＂

＂媽咪，您太快啦，剛才替您付錢找續時黏過啲錢，覺得汚漕，又唔夠時間洗手，所以撇第一塊面包時冇食。。。點知您問，我未答，您已經放入口，唉!＂

＂哈哈哈。。。＂ 心言邊聽邊笑不攏咀，同時將未吞下肚的包用紙巾包起來。

11:15pm 離開Tim Horton 前往機場，11:25pm 到達機場門口，想著下車抱抱女兒，一開車門想下車之際，怎麼車子還向前溜，原來未泊車，隨即反應過來泊車，嚇得女兒抱著心言說：＂您唔好嚇我，要好好照顧自己，不要讓我擔心啊!＂

＂會啦，會啦，玩得開心啲，在外事事小心。＂

回到家裏，女兒來電：＂到了閘口，抵埗會 'we chat' 您!＂

〔資料圖片〕

温哥華小姐

2012 温哥華華裔小姐誕生啦!

應邀出席第十八屆温哥華華裔小姐競選慈善晚宴，心言對選美甚有心得，每年都能和妹子綜合選出與賽果相符的三甲。

今年佳麗水準平均，直至最後晚裝環節，談吐得體的冠軍明星相出來了（貌似陳敏之）。

當宣佈冠軍結果時，剩下得到「優美體態獎」的七號和得到「最上鏡小姐」及「完美肌膚獎」的二號，鄰枱叫著二號，心言叫著七號。。。

七號，Gloria Tang, 鄧佩儀會代表温哥華前赴香港參加「2013年度國際中華小姐競選」！

溫哥華支持您!

精打細算的男仕

＂妳可以幫我嗎?＂一行三人，為首的一位男士 A 君對心言說。

＂當然可以!＂隨手接過其中兩位手上的 cashmere 毛衣。＂$139一件。＂

＂兩件一齊計，有節扣，記著給我長者折扣!＂A 君說。＂除了這，還有什麼折扣嗎?＂

＂您有 $25 優惠咭嗎?＂

＂$25 優惠咭。。。可能冇帶，我唔係想買衫嘅，咁啱行過見到咁抵買。。。＂ 邊說邊查看手提袋，＂如果係寄嚟我一定有，咦，係咪呢張?＂

＂對唔住，呢張已經過咗期，而且我講嘅唔係呢張，係 $25 saving card。＂

＂咁我一定有嘅，不過冇帶，妳可唔可以就咁俾我?＂ 繼續在袋中尋找的 A 君說。

＂對唔住，唔可以。因為銀櫃會唔啱數，要同公司交代!  ＂

＂咁我番去揾到張咭聽日至買。＂

＂咁您就冇咗個長者節扣。＂

＂$25 優惠咭係稅前減定稅後減?＂ A 君繼續問。

＂長者優惠係稅前減，saving card 係稅後減。＂

＂。。。計落都係長者優惠減得多啲!＂ A君心算過後說。

＂不如咁啦，如果您確定有這張優惠咭，我取消呢張單，您返屋企攞番張 saving card 再嚟買，公司閂九點。＂ 心言建議。

＂我哋住喺 Metrotown, 依家差唔多七點，趕唔切。。。如果依家買咗，返去揾到張咭，得唔得攞去 Metrotown 度減番 $25 呀?＂

＂得，今晚九點前!＂

＂咁妳打埋張單啦!＂

＂多謝您! 這裡黑色及灰色的 cashmere 毛衣已經替您分兩袋，希望您再臨光顧。＂

三分鐘後，A 君折回說：＂妳好面善，我同行的友人說妳以前係 Bombay Company 任職?＂

＂唔係我。＂心言答。

＂然後妳去咗間珠寶行度任職。。。＂

＂先生您認錯人，真係唔係我!＂心言肯定地說。

＂對唔住，不過妳真係好面善。。。＂ A 君邊離開邊說。

心言想，重唔快啲番去揾張 saving card，咁多嘢講!

〔資料圖片〕

Senior Discount

＂媽咪，您明天要上班嗎?＂女兒問。

＂要啊，返 12 點。＂

＂我要買飾物送朋友，12 點嚟揾您，好嗎?＂

＂好啊!  噫，明天有 senior discount 喎。不過，啲同事唔知媽咪係 senior。＂

＂No way , aunty, you are not!"  前來探望兒子並小住的朋友笑著說，兒子跟女兒聽著也跟著笑。

＂哈，哈，哈，係真架!＂心言開心地笑著說。

＂咁平幾多先?＂小朋友們齊聲問。

＂15%!＂

＂梗係 safe face, 唔俾佢哋知啦!＂

朋友們，您估心言會點做呢?

〔資料圖片〕

健康飲食

朋友約心言出席一個「環保健康飲食示範」聚會。

聚會中，有專人示範如何選用環保慳電煮食用具，少油省時。。。

當然還有即時試食!

每套煮食用具價值不韮, 實惠組合亦要千元以上，hosting family 則獲贈價值八百元煮食用具一個（每次聚會最小要有三個不同家庭成員參與）。

至於當晚試食嘛。。。

健康是健康，心言還是喜歡自家泡製的少油少鹽!

成人之美

看見一個年青人似乎需要幫忙。。。

＂您好，有什麼可以幫您嗎?＂

年青人打開手機圖像說：＂請問有沒有這款式的項鍊，原價 $42.92 減價至 $32.19，如果有，我想買一條。＂

＂這牌子的項鍊在這邊。。。就是這個，價錢跟您手機資料一樣。＂

＂那我應該夠錢買!＂年青人欣喜地說。

＂送女朋友的?  給您禮物單據好嗎?＂

＂好，麻煩妳。＂年青人靦腆地笑著回答。

＂項鍊連稅 $36.05，謝謝您!＂

年青人掏出他的錢放在飾櫃枱上。。。

有 5 張 $5 紙幣，其他是 $2、$1、25先、1毛、5先的錢幣。。。

心言重複數了三次，共 $36 整，看著年青人：＂對不起，還欠 5先。＂

年青人面有難色：＂噢，我以為剛好夠。＂

他怎樣也再拿不出錢來。。。

心言想成人之美，但身上苦冇 5 先。。。

看著身邊的同事說：＂休息時，我去拿 5 先替他補貼，可以嗎?＂

同事首肯，終成美事!

就到聖誕

〔音樂響起〕

喂，就到聖誕，又到聖誕...

過完上個聖誕，又到今個聖誕。

Santa Claus Is Coming Again！

被騙？

朋友 A 君來電：＂唉，我今日被人呃咗!＂

＂發生乜嘢事？＂

＂Black Friday 蘋果減價，我上網訂咗部新 iPad,  今日去西區蘋果門巿部攞機，順便想將機面貼上保護膜，誰知 Apple 唔做，走去另一間電訊公司都唔做，見商場流動攤位有得做咪俾佢做囉，點知做完要收我 $45，話包永久保養喎。妳上次俾幾多錢?＂

＂$15，C 君同 E 君嘅 iPad 都係我介紹去一間電訊公司貼，點解妳唔問下我哋先吖?＂

＂係啦，我以為係公價咪冇問，點知佢話 $45，都要俾啦!＂

＂妳平時係精明智慧消費者，今次打死狗講價，冇得好講，唔算呃妳。算啦，泡杯茶飲，忘記它，唔好唔開心。＂

＂我次次都會問價錢，就係今次冇，唉，平咗等如冇平。。。＂

＂唔緊要啦，當請咗我飲茶啦!＂

記得啦，要問價!

〔資料圖片〕

打乒乓球

一位熱心的朋友最近鼓勵心言打乒乓球。

兒子和女兒小時候學打乒乓時，心言也上過幾課，可以打「滴滴仔」。

後來在教會打乒乓球時，卻因為腳部受傷而被逼停止。

即管重重阻滯，與高球、羽毛球等球類運動比較，心言還是更愛乒乓球!

今次得到這位朋友耐心指導，心言獲益良多。

萬分感謝!

〔資料圖片〕

唔做好人

朋友茶敘間得悉M君被搶劫受傷送院。

事緣M君下班時取車，見一身穿 hoodie 黑衣男子向她走近，以為他需要幫忙，於是在車旁停下稍候，誰知該男子二話不說，埋身便一記棒球棍向M君的頭打下兼搶手袋，M君應聲倒地仍緊抱著手袋，惟她先生早上坐機出差前將一只金勞留下著她帶回家，M君穿戴手上因而鬆脫，賊人見狀，取錶逃逸無蹤。M君負傷回公司請同事報警。

最終警犬尋回金勞，（警方說通常賊人會把現場搶劫賍物收藏起來，稍後回來再取，以免人賍並獲），物歸原主，M君入院縫了八針，留院觀察一晚無恙，亦算不幸中之大幸！

朋友問M君：＂個天咁黑，有個黑麻麻 lup 住個頭嘅人走埋嚟，妳唔上車先?  妳唔驚咩?＂

＂我以為佢係公司嘅客，或者要幫忙。。。好在無打落架車度!＂

。。。

M君慨嘆：＂以後都唔做好人!＂

〔資料圖片〕

賣什麼？

您道這店賣什麼?

環保

就有這麼有心思的環保!

＂好奇害死貓＂的起源

有網友問＂好奇害死貓＂，關隻貓咩事？!!!

＂好奇害死貓＂是英國的一句諺語，旨在警告人們不要過分好奇，否則會給自己帶來傷害。

現將維基百科所得資料節錄如下，跟大家分享：

這句諺語最早出現在英國劇作家 Ben Johnson 1598 年劇本《人各有癖》(Every Man in His Humour) 中。原句是："Care will kill a cat."

一直到了 1898 年，“care killed a cat” 這句諺語被 E. Cobhan Brewer 收錄到字典中，定義為：Care killed a cat.  It is said that  “a cat has nine lives”  yet care would wear them all out. 中文大意譯為：據說貓有九條命，但即使如此，好奇心仍會把牠們累死的。

真正把 Care 改成 Curiosity 的是在 1909 年 O. Henry 的一篇短篇小說 Schools and Schools："Curiosity can do more things than kill a cat; and if emotions, well recognized as feminine, are inimical to feline life, then jealousy would soon leave the whole world catless."

這句彥語還有後文："Curiosity killed the cat, but satisfaction brought it back."  好奇心害死貓，但是只要好奇心被滿足就沒事。

實惠

接到朋友電話。。。

＂有時間一齊食晚飯嗎?＂

＂好，那裡?＂

＂時間、地點由妳選!＂

＂我選。。。冇什新意喎，唔係「至愛」，就係「人家」。＂

＂由妳決定!＂

＂咁「人家」吧。七點?  七點半?＂

＂由妳決定!＂

＂七點十五分吧!＂

＂咁了lung嘅!＂

＂中間落墨嘛!＂

席間大家談天說地，朋友有感而問心言：＂咦，發覺妳唔係去「至愛」，就係「人家」，點解?＂

＂好簡單，實惠!＂

＂對，實惠!＂另一位朋友開聲支持。

＂朋友三兩知己用餐，唔使太講究氣氛，至緊要價格相宜，地方舒適，有 personal touch 係 bonus。＂心言說出自己的心聲。

同意嗎？

好奇害死貓

因為分心觀看警察執行任務，女兒開車撞上了前面突然停下來的汽車。。。

警察來到發告票給女兒，並且告誡女兒開車要專注!

開車前往現場接女兒（車子撞至要被拖走），對女兒說：＂人安然無恙就好。。。警察做嘢，關妳咩事，咁八卦!＂

＂係囉，好奇害死貓，知錯啦，媽咪！＂

〔資料圖片〕

美麗的誤會

兒子，女兒跟心言一起出席朋友女兒的婚宴。

同桌只認識其中一對夫婦，一直到上第三度菜，招呼的經理與同桌的另外五位客人以為女兒是兒子的女朋友。。。

＂我唔係佢女朋友，佢係我哥哥!＂女兒笑著解釋。

＂你兩個都斯文有禮，好襯，所以誤會啦。＂在座一位太太說。

＂您客氣啦，佢地喺屋企成日打交嘅，重係妹妹打哥哥。。。＂心言打趣說。

散席前，另一位婆婆對心言說：＂您兩個孩子好乖，難得女兒又靚又有禮貌!＂

＂謝謝您!＂

估下

＂媽咪，您看這是什麼?＂ 兒子說。

＂Happy face!＂

各位朋友，知道我們晚飯吃了什麼吧!

家家有本難念的經

最近朋友女兒大婚，夫婦專程抵加，十天來回，行色匆匆。

結婚大事理應喜氣洋洋，奈何未見岳丈母歡容，只見強顏歡笑。

只因門不當戶不對，更非乗龍快婿。。。

家家有本難念的經!

〔資料圖片〕

一個歡樂的晩上

參加了公司的 Party Perfect Beauty Gala, 門券 $10，當中 $2 用作慈善用途，$8 可用作購買香水、化妝品，同時有禮品送贈及抽獎環節，獎品豐富，當晚更有小食，DJ 及歌星助興。

妹子和媽媽一起同來，大家都買了要買的，最開心妹子被抽中得獎，得到一個化妝品籃，而大家亦各自收到一個環保化妝袋。

滿載而歸!

REFASHIONED

〝Made entirely by hand from discarded soda-pop cans --- Your purchase assists in creating economic opportunities for disadvantaged and uneducated woman and their families living in Indonesian villages. www.ReFashioned.com〞

有意思，買了一個!

手提電話與乳癌的關係

昨天從新聞報導得知：乳癌的成因可能和手提電話擺放位置有關。

一個習慣將手提電話放在胸圍內的十七歳少女患上乳癌，腫瘤位置正好與平時放手提電話位置相符。由於相同病例已有幾起，已經引起廣泛關注。

電視新聞街訪中，發覺不少少女喜歡將手提電話放在胸圍之內。理由是可以減低遺失風險，方便拿取及於來電時有貼身感覺，不會 miss call 或 message。

更甚者，有被訪者習慣將錢幣收藏在右胸，電話在左胸。。。

節目告誡觀眾切勿將電話放近胸部，從而減低患上乳癌的風險。

〔資料圖片〕

俄式感冒秘方

星期日在教會聽道。。。

知道講者曾經在俄羅斯事奉，抵步時感冒發燒，得到當地弟兄介紹一條地道秘方，服用之後得到痊癒。

散堂後，心言請教講員這條秘方內容，喜得對方傾囊相授！

心言不感自珍，這裡跟大家分享：

一 shot 伏特加 十 大量楜椒粉

開定枱咁好？

嘩！開定枱咁好？

老婆同阿女都唔知要 Shop 幾耐。。。

咪喇，開餐先咯！

咁啱得咁橋

這兩個星期日心言因為有事，未能與弟兄姊妹們午餐，收到投訴：＂妳唔喺度，等位都等得耐啲，呢個星期仲弊，招呼都冇咁好。。。＂

＂咁啱得咁橋唧，可能啲客遲埋單，埋完單又傾多兩句，樓面唔夠人。。。＂心言試圖解釋。

想起有朋友也曾對心言作過相類似的投訴：＂妳嘅至愛茶餐廳大細超，妳喺度招呼特別好，乜都得，我地自己去，明明有位，想坐番原位，竟然話我地唔夠人數唔准坐，其實咪又係上次咁多人!＂

。。。＂咁啱得咁橋，要留位畀其他客人。。。＂

＂我哋食完，嗰張枱都冇人坐，總之就係唔同啦!＂朋友繼續說。

。。。怎麼說好?

今天晚上跟妹子，弟弟和媽媽往上海館子吃晚飯，席間妹子說：＂髮型師 B 君見我哋常來這館子吃飯，想必唔錯，於是到此一試，誰知湯無味，於是投訴，老闆話：「我哋啲湯係咁嘅啦!」 B 君非常唔滿意佢地嘅服務態度!＂

＂。。。價錢實惠，餸菜唔錯，員工服務態度好好喎，有時老闆見我早到等人，重會請我食糟鹵雜錦，老老實實，我地又唔係大客，請我食嘢，自己都覺得唔好意思!＂

妹子跟弟弟都認同心言所言，正考慮埋單之際。。。

＂甜品造緊，就送到!＂老闆特意來說。

＂多謝!＂心言謝過老闆。

豆沙窩餠 - 送嘅!

咁啱得咁橋。。。

踫上老闆心情好!

早上兩杯水

一對長輩朋友回港前相約午膳。

心言剛做完彩光怕會影響他們胃口，如實告知。

＂唔緊要，我都做過彩光，知道係乜嘢事，一至兩個星期就會復原。除咗搽防曬油，記住要每天早上飲兩杯清水，保持美白，唔係就會前功盡廢啊!＂

長輩朋友在電話上諄諄教誨。

＂知道，知道，待會見。＂

長輩朋友年過七十有多，皮膚依然白滑紅潤。。。

這早上兩杯水，該飲!  該飲!

媽媽好

心言兩個妹妹長得年輕，加以護膚有道，青春常駐，與心言同行，多次被誤會是母女關係。。。

這些年來，妹子和媽媽多次對心言說：＂該好好去弄掉臉上的斑啦!＂

最近，媽媽舊事重提，終於的起心肝走去做激光去斑。

黃醫生說：＂妳的斑不太壞，只是散，試做彩光吧。＂

於是做了 356 shots。

兩天後，跟妹妹，弟弟和媽媽晚飯。飯後，說好一起到超市購物，媽媽卻改變主意跟弟弟先回家。

第二天早上，弟弟來電：＂妳在家嗎，媽媽有東西給妳送過來。＂

媽媽在旁說：＂記得每次喺啲瘦肉湯落一兩包，已經替妳分好，對皮膚好，傷口好快會復元。＂

原來媽媽當晚推說不去超市是趕回家浸花膠，第二天送來。。。

媽媽真好！謝謝您!

酒糟雞腳

食過一位廚藝高超的朋友所做的酒漕雞腳，讚不絶口！

朋友說：＂做這個菜簡單到不得了：水滾落雞腳，熄火蓋 30 分鐘，過冷河前用兩滴醋洗洗，然後用較剪剪去雞腳甲，再剪成三份（方便食用），抹亁後用寶鼎糟鹵浸一個鐘撈起，就完成了！＂

今天心言試了，真的簡單，容易，好味!

後記：記著要撈起，不然會太醎。剩下的糟鹵可用來浸扁豆。

魚樂？

魚樂？

"子非魚，焉知魚之樂？"

"子非予，焉知予不知魚之樂？"

娛樂 ：〕

一抹斜陽

一抹斜陽，蒼蒼鬱鬱幾許悄。。。

看眼前嬌花，想起時光易逝、歲月如流。

心言默默想著：

凡事更要珍惜!

開心

＂您好，有什麼可以幫您嗎?＂ 見一位穿著時尚的洋婆婆在揀選飾物，於是上前招呼。

＂我在想這紅唇項鍊好看嗎?＂ 洋婆婆說。

＂好看啊，特別您今天的衣著打扮，還有您戴的耳環，配這項鍊恰到好處!＂

＂唔知項鍊有多長，我不喜歡太短。。。＂

＂待我給您查看，應該可以調教長短，讓我給您戴上試試，好嗎?＂

＂好!＂ 洋婆婆微笑著點頭。

＂這紅唇的形態很美，顏色亮麗。。。這長度適合嗎?  我替您扣在第一格。＂

＂好，長度啱啱好!  我很喜歡，可以帶著它然後付賑嗎?＂

＂當然可以!  請您隨我到 cashier。＂

洋婆婆開心地付賬離開。

半句鐘後，洋婆婆拿著一盒其他部門的貨品折返找心言說：＂我想妳給我意見，要不要買下來。。。下個月我會去多倫多!＂

＂好呀，讓我看來。。。唔，我跟您一樣，耳朵不耐寒，這品牌質料上乘，寒冬有用，最重要是您載上的時候感覺舒服便買吧。＂

＂就請妳替我開單買下!＂

＂謝謝您 $98，連稅 $109.76。 今天有消費優惠，稅前 $75 送 $25 優惠券，這個月19-30 號通用，希望很快再見到您到來店裏!＂

＂好，謝謝妳，我一定會再來!＂

心言開心。。。

因為客人對心言信任!

一葉之秋！一葉知秋？

看著樹上剩下的一片葉。。。

心言脫口而出：＂一葉之秋!＂ (樹上只剩下一片葉，看來已到深秋!）

朋友搖頭笑著說：＂一葉知秋，代表第一片落葉，意味著秋天的來到!＂

心言的似是而非，簡直惡搞!

終成眷屬

今天跟幾對兒孫滿堂的朋友午膳，大家開心地說著兒孫的故事。

心言見過其中一對朋友的雙胞胎混血孫兒女，他們長相標緻，天真可愛。。。

沒想到他們的爸媽戀愛時，曾經受到家長阻攔。

朋友夫婦對女兒跟外國人譜戀曲甚有成見，嘗試阻撓他們的婚事。

最後，女兒平靜地問她的父母：＂為什麼?＂

＂因為他是外國人!＂

＂如果只因為他是外國人，對不起，這理由我不會順從您們! ＂

婚後，女婿愛屋及烏，尊重長輩，謙恭有禮，事業更如日中天，一雙兒女讓公公婆婆疼錫有加！

朋友夫婦慶幸當年未有拆散這段好姻緣。。。

終於明白到世界大同!

吸引力

到下午茶座喝茶，見一位女士帶同一隻 Certified Service Dog 進來。。。

Service Dog 的樣子英明神武，聰明慧黠，性情溫順良善有禮。

牠靜靜的伏在主人身邊，引來喜愛狗隻的茶客上前逗弄。

心言也禁不住上前和牠打招呼。

狗主說：＂兒子和朋友到沙灘玩樂，我建議兒子把牠也帶去，誰知兒子竟然向我說：「不成，牠將所有女生的注意力都吸走了!」＂

又真係喎。。。

心言在整頓下午茶裡，眼珠子都離不開牠!

夢見小黑

夢見小黑。。。

醒來，小黑呢?

夢中的小黑病癒，毛色卻變白了，身體略見虛弱，依然活潑可愛!

掛念你，永遠的小黑!

勞氣

前往城中看大戲，途中下著大雨。

車內朋友 A 說：＂連日落雨，幾時好天?!＂

＂係囉，都落咗成兩個星期雨啦!＂朋友 B 回答說。

＂真係唔明個溫哥華市長攪什麼，推動單車專線，喺巿中心好好地三線行車，變成一條左轉，一條直行或轉右，一條單車專線，溫哥華一年最少三、四個月連綿下雨，市中心寫字樓啲白領點會同你踩單車返工吖!＂心言有感而發。

＂但係有人贊成喎，佢哋嘅民意調查係一萬人。。。咁都未算數，佢哋仲計劃開多幾條單車線！＂妹子插口說。

＂要市民乗搭公共交通工具，配套又唔夠，唔改善交通系統，擴闊路面，仲要將汽車流量減至三分一。佢應該學北京咁，雙數車牌行星期二、四、六，單數車牌行星期一、三、五，鼓勵巿民 carpool，改善交通流量!"

＂係呀，廣州都係咁!  ＂

＂攪到啲車無路行，單車專線變嘥咗條路，邊有一個發達國家市中心區得一條直行車線，有時真係唔明呢度啲政客個腦係咪生係個 pat pat 度!＂

〔資料圖片〕

大統華跟八佰伴

跟弟妹們吃晚飯，閒話家常，提起 ＂耳水不平衡＂ 秘方，妹子想替朋友買黑皮青豆，心言建議飯後到大統華超市一行。

弟弟說：＂咦，八佰伴係咪即係大統華?＂

＂大統華係大統華，八佰伴係八佰伴，都唔同個 mall。＂ 心言回答說。

＂我公司啲同事係咁講喎。＂

＂好，你公司同事約你去大統華，去到唔見人，你打電話俾同事問：「妳喺邊呀?」「喺大統華。」「唔見妳嘅，我喺賣海鮮嗰度喎。」「我都喺海鮮部喎，唔見你嘅?」  點解呀?    因為你喺大統華，佢喺八佰伴，又或者你喺八佰伴，佢喺大統華囉!＂

跟著，大家笑作一團!

〔資料圖片〕

買外賣要 check 清楚

同妹子睇完戲相約弟弟接媽媽一起吃晩飯，兒子因忙著功課，要心言把食物帶回去給他。

於是埋單前叫了一客咸肉菜飯給兒子。。。

弟弟講究食物存放衛生，特別請侍應生不要將外賣放進發泡膠盒容器。誰知送到枱上，弟弟查看，依然是發泡膠盒，侍應生忙著道歉，說著會將食物轉容器，順手打開盒子，跟著衆人 O 哂嘴。。。

嗄。。。白飯一盒?!

侍應生隨即拿回廚房，回頭拿回一盒咸肉菜飯說：＂廚房唔知攪乜，另一枱都係咁，咸肉菜飯變白飯。＂

四人對望，弟弟跟著說：＂買外賣，真係要 check 清楚，唔好怕麻煩。我就試過幾趟，有湯冇麵，有飯餸，冇湯，返到去至知，俾番你都費時失事!＂

。。。也是道理!

〔資料圖片〕

可惜

今天欣賞了一場非常有水準的粵劇大匯演，服飾美輪美奐，業餘演出者有超水準的演出!

可惜主辦單位的工作人員讓人莫名其妙：

首先，演出期間，有工作人員隨意由台下行上台上進入虎度門，又有由虎度門行出來行落台下。

然後，其中一齣折子戲，個佈景幕兩邊有成尺幾兩尺虛位，台前正在演出，佈景幕後亦見工作人員行來行去，其中一個冇意識地踱步，有一個重望下啲觀眾（你見到人即便是人見到你，咁簡單的 common sense 都缺乏）。

差不多完場時，台上演出，遠遠傳來寒暄問好聲音，見有工作人員跟相熟觀眾熱烈高聲暢談，死未!

重有，啲英文人一早走哂，個司儀繼續中、英文介紹人物劇情，粵劇演出足六小時，都係第一次!

不過，最最難頂係演出期間，坐在隔鄰或後排的觀眾不時傳來讓人聽見的喁喁細語，騷擾到極至，佢地唔應該嚟睇戲，應該去咖啡室!